Mis Lieblingslied Mängisch frooged mi öpper, was i am liebschte losi vom Leonard Cohen. Die Froog wird au immer wider i Internetfore diskutiert. Aber ich han nie chönne e klari Antwort gäh. Scho uf Lieder vom Leonard Cohen vo 1968 hets vier Schtück, won i sehr gern ha: Die Gnädige Schwöschtere, mit dere wunderschöne letschte Stroofe: Won i gange bi, händs no gschloofe... Bis bald, Mariann He, das isch kei Art zum Tschau säge “Dini Hoor uf em Chüssi – wie nen schloofende goldige Schturm“ So vil Manne müend doch rächt ha Ich verschtoh de Tockter und de Heiligi und de Eskimo so guet, well i weiss, was e Frau bin eme Maa chan aarichte. Bi Lieder us eme Zimmer (1969) isch es Vogel uf em Droht, wells es Lied über d Freiheit isch. Uf Lieder vo Liebi und Hass (1971) han i D Johanna vo Orleans am liebschte, well s eso schön und so truurig isch. 1974 isch Nöii Huut für die alti Zeremonie erschine. Bi de schwiizerdüütsche Übersetzige hett i schaurig gern Lover, Lover, Lover debii ghaa, aber ich han nöd gwüsst, wien i sibe Mohl Lover söll übersetze. S Lied göcht eso: Ich han min Vatter gfroged, ich han gseit: «Vatter, ändere min Name, de won i jetz träge isch zudeckt mit Angscht und Dräck und Feigheit und Scham.» Er hät gseit: «Ich han dich i de Körper gschpehrt, ich has als en Art Prüefig tänkt. Du chas en als Waffe bruuche oder zum e Frau zum lächle zbringe.» «Denn loh mi nomohl aafoh», han i grüeft. «Bitte loh mi s nomohl versueche, ich wott es Gsicht wo aaschtändig isch das Mohl, ich wott en Geischt wo ruig isch.» «Ich han mich nie abgwändet», het er gseit, «Ich bin nie devoo gloffe. Du bisch es gsii, wo de Tämpel bout het, du bisch es gsii, wo mis Gsicht verdeckt het.» Und de Geischt vo dem Lied söll rein und frei uufschtiige. Er söll es Schild sii für dich, es Schild gäge de Find. Tod von eme Fraueheld, 1977. Do würd i Ich han e Frau wartend zrugg gloo uuswähle, wills s erschte Lied isch, wo sich de Cohen mit em Alter beschäftiget. Uf Nöii Lieder vo 1979 hets wider ganz vil schöni Schtück, aber D Ballade vo de Schtuute und vom Koboi gfallt mer am beschte. Das isch e wunderbari Art, d Intensität von ere Beziehig z beschriibe. Nächschti Siite

Ufe

Ufe