De Leonard Cohen und ich

Am 14. April 1972 isch i de Victoria Hall in Gänf es Konzert mit em Leonard Cohen gsii. Ich bi sächzäni gsii und han mich nöd gross für Popmusig interessiert. Mini Schwöschter Renata hetti a das Konzert welle, aber d Eltere händ eres nöd erlaubt. Kolleginne händ ire denn zwöi Platte mitbrocht, The Songs Of Leonard Cohen und Songs Of Love And Hate. Ich han die Platte ghört und bin vo Aafang a ganz fasziniert gsii. Die Stimm, d Stimmig vo dene Lieder het mi total gfange gnoo. Debii han i fascht nüüt verschtande, ich ha chuum Änglisch chönne.

Bald isch au Songs From A Room uftaucht. Ich han alles uf Kassettli ufgnoo und immer wider glosed. Es isch wunderbar gsii. Ich ha s Gfüel gha, do sig eine, wo mich verstöchi. Ich han aafoo übersetze, Wort für Wort. Und han immer meh verschtande und han immer meh gschpürt: Das isch es!

Ich han em Cohen sini Romän und d Gedichtbänd entdeckt und verschlunge. Schöne Verlierer und Das Lieblingsspiel han i sogar gläse und uf Tonband uufgnoo, i de Summerferie duss im Gartehüüsli.

Alli Platte han i kauft, sobalds erschine sind, schpöter sind natürli d CD dezue choo. Wenn es Meitli het welle mit mir zäme sii, hets müesse Cohen lose. Mit de einte isch es wunderbar gsii, die andere sind bald nümme choo.

Ich han alli Lieder uf düütsch übersetzt, d Esther het debii gholfe. Das Werk isch no unvolländet.

Mängisch isch es nöd ganz eifach gsii, zum Bischpil mit Death Of A Ladies’ Man. Do het mer sich zerscht müesse draa gwöne. Aber es het au vil grossartigi Momänt gäh, öppe s erschte lose vo Recent Songs oder vo The Future.

Ich bin a jedes Konzert gange, wo i de Nöchi gsii isch:

21. Juni 1976	Mis erschte Konzert im Zürcher Kongresshuus. Mini Begleiterin isch d Michèle.
28. Novämber 1979	Zäme mit de Eliane bin i am ersche vo zwöi Konzert im Kongresshuus Züri.
26. Oktober 1980	D Ursula chunnt mit zum ersche Konzert im Kongresshuus. Ich nimms mit em Diktafon uuf, obwol das verbotten isch.
5. März 1985	D Gaby schänkt mer s Billet für s Konzert i de Muschtermäss Basel und d Übernachtig im Hotel.
15. Mai 1988	Im Kongresshuus Züri mit de Gaby
21. Mai 1993	S vorläufig letschte Konzert: Wieder im Kongresshuus Züri, begleitet vo der Esther.

I minere Erinnerig gits no es wiiters Konzert, villicht i de Rote Fabrik oder an eme andere gschpässige Ort, ich bi hinder eme Pfoschte gsässe. Aber vilicht han i das nur träumt.

Mängisch bin i sehr einsam gsii als Fän vom Leonard Cohen. Ich han niemer kennt, wo s gliiche empfunde het wien ich. Denn isch d Ziit vom Internet choo. Zerscht han i d Siite vom Carter Page entdeckt, denn isch de Jarkko us Finnland choo. Er hät mir de Zuegang zu ganz vil neue Informazione gschaffe. Vo im und vo villne andere han i en Huufe CDs, wos eigentlich gar nöd döfti gäh.

De Shirien us Oregon han i Live Songs gschickt, well die CD z Amerika nöd erhältlich gsii isch. Es isch e wunderbari Imeil-Fründschaft entschtande.

Ganz e schööni Ziit hämmer au im Summer 2002 ghaa, wo sich Cohen-Fäns us aller Wält uf Hydra troffe händ.

Jetzt grad bin i draa, Dear Heather lehre z verschtoo und gern überzchoo.

Wenns mer guet goot,

los i Leonard Cohen.

Wenns mer schlächt goot,

los i Leonard Cohen.

Wenns mer langwiilig isch,

los i Leonard Cohen.

Wenn i im Schtress bi,

los i Leonard Cohen.

Wenn i nüüt anders möcht ghöre,

los i Leonard Cohen.

Ufe

Es Geschtändnis

Ufe